30 oktabr
kuni
poytaxtimizdagi “Panarams Hotel
Tashkent” mehmonxonasida “Kodeks
Alimentariusning oziq-ovqat xavfsizligi va xalqaro oziq-ovqat savdosini
yaxshilashdagi roli” mavzusida davra suhbati o‘tkazildi.
Unda
O‘zbekiston Respublikasi Prezidenti Administratsiyasi va Oliy Majlis Qonunchilik palatasi vakillari,
JSST, FAO mas’ullari, shuningdek, oziq-ovqat xavfsizligi sohasidagi vakolatli
organlar – Sanepidqo‘mita, Qishloq xo‘jaligi vazirligi, Veterinariya va
chorvachilikni rivojlantirish qo‘mitasi, Karantin va o‘simliklarni muhofaza
qilish agentligi, Texnik jihatdan tartibga solish agentligi hamda oziq-ovqat
mahsulotlarini ishlab chiqarish, qayta ishlash va sotish sohasidagi
tadbirkorlik sub’ektlari, xalqaro tashkilotlar vakillari ishtirok etdi.
Tadbirni
Sanepidqo‘mita raisi o‘rinbosari N.Atabekov kirish so‘zi bilan ochib berdi.
Tadbirda so`z olgan JSST/Yevropa oziq-ovqat xavfsizligi va zoonoz kasalliklar
bo'yicha mutaxassis Piter Sousa Xojskov “Kodeks Alimentarius oziq-ovqat
xavfsizligini yaxshilash va xalqaro oziq-ovqat savdosini osonlashtirish uchun
ahamiyati” yuzasidan ma`lumot berib o‘tdi.
Ma’lumot o‘rnida aytish kerakki Kodeks Alimentarius –
bu yagona formatda taqdim etilgan oziq-ovqat mahsulotlariga oid xalqaro
standartlar, ko‘rsatmalar, normalar va qoidalar to‘plami hisoblanadi. Kodeks
Alimentariusga a’zo bo‘lish import qiluvchi mamlakatlarda O‘zbekiston
mahsulotlariga bo‘lgan ishonchni kuchaytiradi, bu milliy tovarlar eksportining
o‘sishiga ta’sir qilsa, ikkinchi tomondan faqat yuqori sifatli va xavfsiz
mahsulotlar respublikaga import qilinishiga erishiladi.
Oziq-ovqat
sohasida faoliyat olib boruvchi xo‘jalik yurituvchi sub’ektlarga Kodeks
Alimentarius standartlari yuzasidan tushuntirish ishlarini olib borilishi va
xalqaro tajribaga asoslangan amaliyotlarni joriy qilishda ko‘maklashish
bo‘yicha mas’ul organ Kodeks Alimentarius milliy komissiyasi hisoblanadi.
Milliy komissiya Sanitariya-epidemiologik osoyishtalik va jamoat salomatligi
qo‘mitasi huzurida tuziladi.
Davra suhbatida
loyihaning kelgusidagi faoliyati va O‘zbekiston Milliy komissiyasi a’zolarining
roli yuzasidan muhokamalar olib borildi. Kodeks Alimentarius masalalari
bo‘yicha tarmoqlararo hamkorlikni yo‘lga qo‘yilishi Respublikamizda oziq-ovqat
xavfsizligini yanada ta’minlanishiga ijobiy ta’sir ko‘rsatadi.
Sanepidqo`mita
Axborot xizmati
@sanepidcommittee