Yangiliklar
NOVVOYXONALARNING SANITARIYA HOLATIGA QO‘YILADIGAN GIGIYЕNIK TALABLAR
Novvoyxonalar loyiha asosida yoki moslashtirilgan holda qurilgan, hokimiyat tomonidan ajratilgan joylarda tashkil etiladi.
- Хonalar ta’mirlangan, poli va devorlari va shifti oson yuviluvchi va zararsizlantiruvchi vositalarga chidamli qoplamalar bilan qoplanishi, issiq va sovuq suv ta’minotiga hamda oqova suv tizimiga ulanishi shart;
- novvoyxonada un saqlash uchun maxsus joy va taglik, xamir qorish uchun xampa, xamirni saqlash, zuvala qilish, tindirish, non yasash stollari bo‘lishi, ular gigiyenik qoplamlar bilan qoplanishi shart;
- tandir atrofi oqlangan, havo so‘ruvchi dudburon bilan ta’minlangan bo‘lishi kerak;
- tandirdan uzilgan issiq nonni taxlash va sovutish uchun stol tashkil etib, uning usti oziq-ovqatga mo‘ljallangan qoplama bilan qoplanishi lozim;
- ish stollari oziq-ovqat bilan kontaktda bo‘lishiga ruxsat etilgan materiallardan tashqari boshqa (un qopi, lenolium, qurilish materiallari va hokаzolar) materiallar bilan qoplanishi taqiqlanadi;
- novvoyxonaga keltirilgan un, tuz, yog‘ va boshqa xomashyolar xavfsizligi va sifatini kafolatlovchi hujjatlar asosida qabul qilinishi shart;
- unni xampaga solishdan avval elakda elash va shundan so‘ng xamir qorilishiga ruxsat etiladi;
- ishchilar muddatli tibbiy ko‘rikdan, sanminimum kursidan o‘tgan bo‘lishi, uch sidradan maxsus ust-bosh (oq xalat-shim, yenglik, fartuk, qalpoqcha) bilan ta’minlangan bo‘lishi, shaxsiy gigiyenaga rioya etgan holda faoliyat yuritishlari lozim;
- novvoyxona romlari hasharotlardan saqlanishi uchun maxsus setkalar bilan yopilishi, kemiruvchi va hasharotlarga qarshi deratizasiya va dezinseksiya tadbirlari o‘tkazish uchun dezstansiyalar bilan shartnomalar tuzilishi lozim;
- novvoyxonada ishchilar uchun alohida dam olish, yechinib-kiyinish xonasi tashkil etilishi kerak, ish joyida yechinib-kiyinish, yotoq tashkil etish taqiqlanadi;
- novvoyxonada har kuni ishdan keyin sanitariya tozalash ishlari o‘tkazilishi, ish stollari, jihozlar, xampalar tozalab yuvilishi va quritilishi, chiqindilarni o‘z vaqtida olib ketilishi talab etiladi;
- novvoyxonalarni tashqi hududi obodonlashtirilishi, gullar ekilishi, kundalik tozalash ishlarini amalga oshirishga alohida e’tibor qaratish lozim.
Non aziz ne’mat, uni tayyorlashda tozalik va poklikka rioya qiling!
Sanepidqo‘mita
Axborot xizmati
@sanepidcommittee
So’ngi yangiliklar